என்னிடம் இருக்கும்
எந்த அழகு சாதனத்தை
விடவும்
உன் ஒற்றைப் பார்வை
என்னை அழகாக்கி விடுகிறது.

எதற்கெடுத்தாலும்
வெட்கப்படுகிறாயே
என்று
என்னைக் கேலி செய்யாதே.
இந்த உலகில்
உன்னைத் தவிர வேறு
யாராலும்
என்னை வெட்கப்படுத்த
முடியாது.

எல்லாப் பெண்களுமே
நிற்கும் காரை கடக்கையில்
அதன் கண்ணாடியில்
தங்களைச் சரி செய்து
கொள்கிறார்கள்.
நானோ
உன்னைக் கடக்கையில்
உன் முகத்தைப் பார்த்தே
சரி செய்து கொள்கிறேன்.

நீ யாருக்கோ செய்த
மௌன அஞ்சலியைப்
பார்த்ததும்..
எனக்கும்
செத்துவிடத் தோன்றியது.

நீ எந்த உடையிலும்
கவிதையாகத்தான் இருக்கிறாய்
சேலை கட்டியிருக்கும் போதுதான்
தலைப்புடன் கூடிய கவிதையாகிறாய்.

தேவதைகளின் தேவதை

வெள்ளைத் திரைமூடி
தாளுக்குள் ஒளிந்திருந்த தேவதை,
வண்ணத்தூரிகையால் நீ திரைவிலக்கியதும்,
உன் பேரழகைக் கண்ட அதிர்ச்சியில்
ஓவியமாக உறைந்து போகிறாள்!
*
உன்னைத்தொட்டுவிடும்
கடைசி ஆசையில் வானத்து தேவதைகளெல்லாம்
துளித்துளியாய் விழுந்து செத்துக்கொண்டிருக்கிறார்கள்.
நீயோ குடைப்பிடித்து புறக்கணிக்கிறாய்.
*
தமிழ்ச்சொற்களாக மாறி உன்னிடம்
தவம் கிடக்கின்றன் தேவதைகள்.
நீயோ ஆங்கிலத்தில் கவிதையெழுதுகிறாய்.
தமிழில் மொழிபெயர்க்குமாறு என்னை நச்சரிக்கின்றன தேவதைகள்!
*
சில கணமேனும்
உன்னைப்போல் அழகாகும் ஆசையில்
நீ முகம் பார்க்கும் கண்ணாடியாக
மாறிவிடத் துடிக்கின்றன தேவதைகள்.
*
மின்சாரம் போன இரவுகளில்
மின்னலைக் கண்டு ஒளியாதே.
இருட்டில் உன்னைக் காணாமல்
மின்னலடித்து தேடுகின்றன தேவதைகள்!

உன் நினைவோடுதான்...

உன்னை மறந்து இருப்பேன் என நினைத்தாயோ
இல்லை துறந்து இருப்பேன் என எண்ணினாயோ
எந்தன் இதயத்தை திறந்து பாரடி மெல்ல
இன்றும் உன்னை எறிந்து விடாமல் எனக்குள்
இன்னும் பறந்து கொண்டு தான் இருக்கின்றாய்
நான் இறந்து போகும்வரை உன் நினைவோடு...